Э.Ананд хүүгийн эмчилгээнд зориулан Мотоциклоо хандивласан Д.Номинчимэгт маш их баярлалаа. Түүний мотоциклыг “Хүннү мото” клубынхан сугалаанд оруулж 20 сая төгрөг босгожээ. Хүннү мотоциклчдын клуб Ананд хүүд 20 сая төгрөгийг гардуулахаар гэрт нь очжээ.
Д.Номинчимэг БНСУ-д суралцдаг оюутан бөгөөд алс орныг зорихоосоо өмнө нуруу болон хөлөө хүндээр гэмтээж, хоёр сар гаруйн хугацаанд асаргаанд байжээ.Тэрбээр Ананд хүүгийн амсаж буй зовлонг биеэрээ туулж, алхаж, гүйж, хүссэнээрээ хөдлөхийг ямар их хүсэж байснаа санаад хүүд эрүүл саруул ирээдүй бэлэглэхийн тулд өөрийн хайртай мотоциклоо зарж, хандив өргөхөөр шийдсэн байна.
Д.Номинчимэг “ Амьдрал баялаг. Би сургуулиа төгсөөд хүссэн ажилдаа ороод дахиад дуртай мотоциклоо авч болно. Надад цаг хугацаа, залуу нас байна. Харин Ананд дүүд минь цаг, минут, секунт бүр үнэ цэнэтэй. Аль болох эмчилгээгээ хурдан хийлгэж, эдгэрэх нь чухал.
Монголоос ирэхээсээ өмнө мотоциклоо зарах гээд яг хүн нь ирээд авах үед дууг нь сонсоод л уйлчихсан. Зарж чадаагүй. Харин одоо Ананд дүүдээ амьдрал бэлэглэхэд, жаахан ч гэсэн хувь нэмэр болох үүднээс зарж байгаадаа баяртай байна” хэмээжээ.
